मकवानपुर। हेटौँडा उपमहानगरपालिका–१९ बस्तीपुरबाट मनहरी गाउँपालिका–३ भुन्द्रुङलाई जोड्ने राप्तीखोलामा १७० मिटर लामो पुल निर्माण गरिएको छ ।
बागमती प्रदेशको भौतिक पूर्वाधार विकास मन्त्रालयअन्तर्गतको पूर्वाधार विकास कार्यालयले निर्माण गरेको पुल बागमती प्रदेशका मुख्यमन्त्री इन्द्रबहादुर बानियाँ, भौतिक पूर्वाधार विकासमन्त्री डा दिनेशचन्द्र देवकोटा तथा १०३ वर्षीया स्थानीय वृद्धा सरस्वती अर्यालले संयुक्त रूपमा उद्घाटन गरे । उद्घाटन समारोहमा मुख्यमन्त्री बानियाँले सङ्घीय व्यवस्थाले जनताका लागि धेरै काम गर्न थालेको चर्चा गर्नुभयो । निर्वाचन घोषणा भइसकेको अवस्थामा मतदाताले आफूलाई मन परेका पार्टी र उम्मेदवारलाई स्वतन्त्र रूपमा मतदान गर्नसक्ने अवसर लोकतन्त्रको सबैभन्दा ठूलो उपलब्धि भएको उहाँले बताउनुभयो ।
मुख्यमन्त्री बानियाँले भ्रम फैलाउने तथा गलत काम गर्ने प्रवृत्तिलाई अब हामीले धेरै समय सहन नसक्ने स्पष्ट पार्नुभयो । राणाशासनकालदेखि सुरु भएको राजनीतिक यात्राले सङ्घीय लोकतान्त्रिक गणतन्त्रसम्म आइपुग्दा अबको आवश्यकता सुधार र परिमार्जन मात्र रहेको उहाँको भनाइ थियो । यस क्रममा उहाँले जनप्रतिनिधिको सङ्ख्या तथा पालिकाको सङ्ख्या समायोजन गर्ने प्रस्ताव प्रस्तुत गर्नुभएको छ । मुख्यमन्त्री बानियाँले समग्र विकाससँगै जनताको जीवनस्तर उकास्न रोजगारीमुखी कार्यक्रम आवश्यक रहेको उल्लेख गर्दै कृषिजन्य उत्पादनलाई सीप, तालिम र प्रविधिसँग जोड्न स्थानीय तहलाई आग्रह गर्नुभयो ।
गाउँघरमा बसोबास गर्ने युवालाई सहलगानीमा रोजगारीमा जोड्न आगामी बजेटमार्फत प्रदेश सरकारले विशेष कार्यक्रम ल्याउने प्रतिबद्धता उहाँले जनाउनुभयो । “बाटो बनेपछि गाउँमा सुविधा पुगेको छ, उत्पादन बजारसम्म लग्न सजिलो भएको छ, अब उत्पादनलाई आधुनिक बनाउँदै आयवृद्धिमा जनतालाई जोड्नु हाम्रो जिम्मेवारी हो,” मुख्यमन्त्री बानियाँले भन्नुभयो । राप्तीखोला पुल निर्माणका लागि रु २९ करोड ५९ लाख ३८ हजारमा सम्झौता भएको थियो ।
