काठमाडौं । देशकै सबैभन्दा ठूलो विश्वविद्यालय त्रिभुवन विश्वविद्यालय (त्रिवि) फेरि परीक्षा व्यवस्थापनको विषयमा विवादमा तानिएको छ। एमबीए प्रथम सत्रको एमजीटी विषयको प्रश्नपत्र परीक्षा सञ्चालन भइरहेकै समयमा सामाजिक सञ्जालमा सार्वजनिक भएपछि विश्वविद्यालयको परीक्षा प्रणालीको विश्वसनीयतामाथि गम्भीर प्रश्न उठेको हो।
घटनापछि व्यवस्थापन संकाय डीनको कार्यालयअन्तर्गत परीक्षा सञ्चालन समितिले छानबिन समिति गठन गरेको छ। समितिलाई प्रश्नपत्र कसरी र कहाँबाट बाहिरियो, त्यसमा कसको संलग्नता थियो र भविष्यमा यस्ता घटना दोहोरिन नदिन के–कस्ता सुधार आवश्यक छन् भन्ने विषयमा अनुसन्धान गर्ने जिम्मेवारी दिइएको छ।
डीन कार्यालयले जारी गरेको विज्ञप्तिमा परीक्षा सञ्चालनकै क्रममा प्रश्नपत्र सामाजिक सञ्जालमा सार्वजनिक हुनु परीक्षा प्रणालीको मर्यादा र विश्वसनीयतामाथिको गम्भीर चुनौती भएको उल्लेख गरिएको छ। घटनालाई अत्यन्त गम्भीर रूपमा लिइएको भन्दै सत्यतथ्य पत्ता लगाउन छानबिन प्रक्रिया सुरु गरिएको जनाइएको छ।
साउन ८ गते सञ्चालन भएको एमजीटी विषयको परीक्षा भइरहेकै बेला प्रश्नपत्र बाहिरिएको थियो। प्रश्नपत्र सार्वजनिक भएपछि विद्यार्थी, अभिभावक तथा शैक्षिक वृत्तमा परीक्षा सुरक्षामाथि प्रश्न उठेको छ। यदि प्रश्नपत्र परीक्षा अवधिमै बाहिरिएको पुष्टि भयो भने यसले परीक्षाको निष्पक्षतामाथि प्रत्यक्ष असर पर्ने सरोकारवालाहरूको भनाइ छ।
यस घटनाले केवल एउटा प्रश्नपत्र लिक भएको विषय मात्र नभई त्रिविको परीक्षा सुरक्षा प्रणाली, गोपनीयता र व्यवस्थापन क्षमतामाथि समेत बहस सुरु गराएको छ। अब छानबिन समितिको प्रतिवेदनले प्रश्नपत्र बाहिरिएको वास्तविक कारण र जिम्मेवार पक्ष पहिचान गर्न सक्ने वा नसक्ने भन्नेमा सबैको ध्यान केन्द्रित भएको छ।
