मकवानपुर / मकवानपुरको नवलपुरमा ट्रकको ठक्करबाट एक युवकको मृत्यु भएको छ । मृत्यु हुनेमा हेटौंडा उपमहानगरपालिका –१२ का २० वर्षीय सुशान्त पुडासैनी रहेका छन् ।
हेटौडाबाट मनहरीतर्फ जाँदै गरेको बागमती प्रदेश ३००४ प ७१९१ नम्बरको मोटरसाइकललाई ना ७ ख ८८१ नम्बरको लहरी ट्रकले मंगलबार बिहान ठक्कर दिएको थियो ।
ट्रकको ठक्करबाट पुडासैनीको घटनास्थलमै मृत्यु भएको जिल्ला प्रहरी कार्यालय मकवानपुरका प्रहरी नायब उपरीक्षक जयश्वर रिमालले जानकारी दिए ।
मृतक पुडासैनीको शव पोस्टमार्टमका लागि हेटौंडा अस्पताल ल्याइएको प्रहरी नायब उपरीक्षक रिमालले बताए ।
ट्रकका चालक लमजुङ घर भएका वर्ष ४९ को पूर्णबहादुर भुजेललाई नियन्त्रणमा लिएर आवश्यक अनुसन्धान अघि बढाएको प्रहरीको भनाई छ ।
