काठमाडौं । सम्पत्ति शुद्धीकरणसम्बन्धी मुद्दामा ५२ करोड ५० लाख रुपैयाँ बिगो दाबी गरिएका नेपाल उद्योग वाणिज्य महासंघका पूर्वअध्यक्ष शेखर गोल्छा मंगलबार विशेष अदालतमा हाजिर भएका छन् । उनीविरुद्ध दायर मुद्दामा बयान सुरु भएसँगै अब अदालतको प्रक्रिया थुनछेकतर्फ अघि बढ्ने भएको छ ।
गोल्छा विशेष अदालतका अध्यक्ष वासुदेव आचार्य तथा सदस्यद्वय हेमन्त रावल र विदुर कोइरालाको इजलासमा बयानका लागि उपस्थित भएका हुन् । उनको बयान अहिले चलिरहेको छ ।
बयान सकिएपछि अदालतमा थुनछेकसम्बन्धी बहस सुरु हुनेछ । वादी र प्रतिवादी दुवै पक्षको बहस पूरा भएपछि गोल्छालाई पुर्पक्षका लागि थुनामा पठाउने, धरौटीमा रिहा गर्ने वा साधारण तारिखमा राख्ने भन्ने विषयमा अदालतले निर्णय गर्नेछ । सम्पत्ति शुद्धीकरण निवारण ऐन, २०६४ अन्तर्गत दायर मुद्दामा गोल्छासहित ३४ जना व्यक्ति र पाँच कम्पनीलाई प्रतिवादी बनाइएको छ । मुद्दामा गोल्छाविरुद्ध ५२ करोड ५० लाख रुपैयाँ बराबरको बिगो दाबी गरिएको छ ।
यो मुद्दामा गोल्छासँगै दीपक भट्ट र शुलभ अग्रवालसहित अन्य प्रतिवादीमाथि समेत ठूलो रकम बिगो दाबी गरिएको छ । भट्टविरुद्ध २६ अर्ब ६३ करोड २७ लाख ७१ हजार ५९ रुपैयाँ ६८ पैसा तथा अग्रवालविरुद्ध २५ अर्ब ५९ करोड २० लाख ६ हजार १२४ रुपैयाँ ३१ पैसा बिगो मागदाबी गरिएको छ ।
ठूलो रकमको बिगो दाबी रहेको मुद्दामा गोल्छा स्वयं अदालतमा उपस्थित भएर बयान दिन थालेपछि अब उनको हकमा अदालतले लिने थुनछेक निर्णयतर्फ ध्यान केन्द्रित भएको छ । बयानपछि हुने दुई पक्षीय बहसले गोल्छा तत्काल हिरासतमा जाने हुन्, धरौटीमा बाहिरिने हुन् वा सामान्य तारिखमै मुद्दा लड्ने हुन् भन्ने तय गर्नेछ । त्यसैले मंगलबारको बयानपछि विशेष अदालतको आगामी आदेश यो मुद्दाको तत्कालीन महत्वपूर्ण चरण बन्ने देखिएको छ ।
