बुटवल / कपिलवस्तुमा श्रीमतीको हत्याको आरोपमा प्रहरीले एक जनालाई पक्राउ गरेको छ ।
पक्राउ पर्नेमा महाराजगञ्ज नगरपालिका –११ बाबा बनगाईका ४५ वर्षीय रामकेवल लौनिया रहेका छन् ।
उनले गत भदौ १५ गते श्रीमती ३५ वर्षीया चिन्का लोनियालाई बुद्धभूमि नगरपालिका –९ चम्पापुरस्थित कपिलबस्तु साझेदारी सामुदायिक जङ्गलमा लगेर हत्या गरी रामकेवल फरार भएका थिए ।
भदौ १५ गतेदेखि हराएकी चिन्काको शवको कंकाल असोज १७ गते जङ्गलमा फेला पारेको कपिलवस्तु प्रहरी प्रवक्ता धर्मराज भण्डारीले बताए ।
इलाका प्रहरी कार्यालय गोरुसिङ्गे कपिलवस्तुबाट खटिएको प्रहरी टोलीले लोनियालाई कार्तिक १९ गते बिहान बुद्धभूमि नगरपालिका –९ डुमराबाट पक्राउ गरेको हो ।
पर पुरुषसँग अवैध सम्बन्ध राखेको शंका गरी श्रीमतीलाई सम्झाउँदा सोही विषयलाई लिएर श्रीमान श्रीमतीबिच दैनिक झगडा हुने गरेको र सम्बन्ध विच्छेद माग्दा नदिएकोले हत्या गरेको रामकेवलले बयान दिएका छन् ।
