सल्यान / सल्यानको कपुरकोटमा भएको बस दुर्घटनामा परी मृत्यु हुनेको संख्या १२ पुगेको छ ।
मृत्यु हुनेमा १० जना पुरुष र २ जना महिला रहेका जिल्ला प्रहरी कार्यालय सल्यानका डीएसपी गोविन्द थापाले जानकारी दिए ।
आइतबार विहान ११ बजेतिर सल्यान सदरमुकाम खलंगाबाट दाङको तुल्सीपुरतर्फ गइरहेको ना १ ख १५५२ नम्बरको बस कपुरकोट गाउँपालिका –५ स्थित खारखोलामा दुर्घटना भएको थियो ।
दुर्घटनामा कम्तीमा १८ जना घाइते भएका प्रहरीले बताएको छ । घाइतेमध्ये गम्भीर अवस्थाका ७ जनालाई उपचारका लागि नेपालगञ्ज पठाइएको छ ।
अरु घाइतेको श्रीनगर र खलंगाका विभिन्न अस्पतालमा उपचार भइरहेको डीएसपी थापाले जानकारी दिए ।
बस सडकबाट २०० मिटर तल खसेको थियो । तिहार मनाएर शहरतर्फ फर्किँदै गरेकाहरु दुर्घटनामा परेका हुन् ।
