काठमाडौँ / भक्तपुरबाट स्रोत नखुलेको ८० लाख रुपैयाँ नगदसहित प्रहरीले एक जनालाई पक्राउ गरेको छ ।
पक्राउ पर्नेमा बाग्लुङ गल्कोट नगरपालिका –१० पाण्डवखानी स्थायी घर भइ हाल काठमाडौँको कोटेश्वर बस्ने ३६ वर्षीय चित्रबहादुर पुन मगर रहेका छन् ।
लोकन्थली मनहरा आँखा अस्पताल नजिकै हुण्डीको कारोबार भइरहेको विशेष सूचनाको आधारमा बुधबार राति वृत्त ठिमीबाट खटिएको प्रहरीको टोलीले मगरलाई बा४९प ८५६५ नम्बरको स्कुटर र नगद ३० लाख रुपैयाँसहित नियन्त्रणमा लिएको थियो ।
अनुसन्धानको क्रममा उनको कोठाबाट थप ५० लाख रुपैयाँ फेला परेको महानगरीय प्रहरी परिसर भक्तपुरका प्रमुख प्रहरी उपरीक्षक शिवकुमार श्रेष्ठले जानकारी दिए।
