बिर्तामोड / सरकारले संविधान दिवसको अवसरमा पत्रकारहरूलाई पनि विभिन्न मानपदवी तथा पदकबाट विभूषित गर्ने भएको छ ।
पत्रकारिता मार्फत आ–आफ्नो क्षेत्रमा योगदान पुर्याउने ५० जना पत्रकारहरूलाई सरकारले मानपदवी, अलङ्कार र पदकद्वारा विभूषित गर्ने भएको हो ।
तर पत्रकार हरिबहादुर थापा र कार्टुनिस्ट रविन सायमीले भने सरकारबाट विभूषण नलिने घोषणा गरेका छन् । थापा र सायमीले सामाजिक संजालमा मार्फत आफूहरू विभूषण ग्रहण नगर्ने घोषणा गरेका हुन् ।
सरकारले थापालाई सुप्रबल जनसेवाश्री बाट र सायमीलाई प्रवल जनसेवा श्री’ पदकद्धारा विभूषित गर्ने घोषण गरेको थियो ।
पत्रकार थापाले यसअघि सरकारले पटक पटक पदकका लागि आफूलाई सोधेको तर यो सरकारले सोध्दै नसोधी नाम राखेको बताउँदै उक्त पदक नलिने घोषणा गरेका हुन् । उनले पदकका लागि सरकारलाई धन्यवाद समेत दिएका छन् ।
‘सुप्रबल जनसेवाश्रीमा १२ नम्बरमा उल्लिखित म हरिबहादुर थापा पदक अस्वीकार गर्ने जानकारी गराउँछु’, उनले लेखेका छन्, –‘मैले मानपदवी, अलंकार, पदकको विकृति, पदक पाउनेको सार्वजनिक सुयोग्यताबारे समाचार–विश्लेषण–पुस्तकमार्फत लामो समयदेखि प्रश्न उठाइरहेको छु । राज्यले सम्मान नै गर्नुहुन्न भन्ने होइन, तर सम्मान स्वयं सम्मानित हुने गरी मात्र सम्मान गर्नुपर्छ । कोही किन पदक पाउँछ वा दिइन्छ भन्नेबारे खुला बहस हुनुपर्छ, विधि लोकतान्त्रिक र पारदर्शी हुनुपर्छ ।’
थापा लामो समय कान्तिपुरमा आबद्ध थिए । उनी अहिले इ–कागजको प्रधान सम्पादकको रुपम कार्यरत छन् ।
त्यस्तै कार्टुनिष्ट सायमीले पनि सामाजिक संजालमा लेखेका छन् – ‘सरकारले मलाई प्रवल जनसेवा श्रीबाट विभुषित गर्ने निर्णय गरेको रहेछ । तर हाललाई यो विभूषण ग्रहण नगर्ने निर्णय गरेको छु ।’
सायमीले आफू ‘स्वतन्त्र रुपमा पत्रकारितालाई सहयोग गर्ने मान्छे’ भएकाले यो पदक लिन नसुहाउने बताएका छन् । सरकारबाट वितरण हुने विभूषणले राष्ट्रियस्तरको प्रतिष्ठा कायम गर्न पनि नसकेको उनको भनाइ छ ।
पदक पाउने पत्रकारहरूको (नामावली)
