विराटनगर/ मोरङको बुढीगंगामा आज (बिहिवार) कार अनियन्त्रित भइ दुर्घटना हुँदा चारजना गम्भिर घाइते भएका छन् । कोशी राजमार्गमा विराटनगरतर्फ आइरहेको बा ११ च १५७१ नम्बरको कार आफैं अनियन्त्रित भई पाईनियर उद्योग अगाडि बिजुलीको पोलमा ठक्कर खाँदा चारजना घाइते भएका हुन् ।
दुर्घटनामा कार चालक बेलकारी नगरपालिका–१ का ३८ वर्षीय बाबुराम कार्की, ४३ वर्षीया गीता लिम्बु, ३० वर्षीया चन्द्रकला राई र ५५ वर्षीया कानी धिमाल घाइते भएको इलाका प्रहरी कार्यालय निमुवाले जानकारी दिएको छ ।
घाइतेमध्ये कार्की र लिम्बुलाई भित्री चोट लागेको र बोल्न सक्ने भएपनि राईको बाहिरी चोट नदेखिएको र बोल्न नसक्ने तथा धिमाललाई समेत बाहिरी चोट नदेखिएको तर अवस्था गम्भीर रहेको प्रहरीले जनाएको छ । चारैजनालाई विराट टिचिङ अस्पतालमा उपचारका लागि भर्ना गरिएको र दुर्घटनामा परेको कार नियन्त्रणमा लिइएको प्रहरीले जनाएको छ ।
