बिर्तामोड / मोरङको बेलबारीबाट लागूऔषध कारोबार गर्ने तीन जनालाई प्रहरीले पक्राउ गरेको छ ।
पक्राउ पर्नेमा बेलबारी –१ का २३ वर्षीय सन्तोष राई, सोही ठाउँका ३२ वर्षीय ज्ञानबहादुर राई र धनकुटाका २६ वर्षीय महेश्वर राई रहेका छन् ।
होटलमा गाँजाको अवैध कारोबार हुने विशेष सूचनाको आधारमा मंगलबार इलाका प्रहरी कार्यालय बेलबारीका प्रहरी निरीक्षक सरोज खनालको नेतृत्वमा खटिएको प्रहरी टोलीले उनीहरूलाई पक्राउ गरेको हो ।
पक्राउ परेकाहरूको साथबाट प्रहरीले १९ केजी ६ सय ५० ग्राम गाँजा बरामद गरेको छ । पक्राउ परेका मध्ये मुख्य कारोबारी सन्तोष रहेको खुलेको छ । सन्तोष र ज्ञानबहादुर दाजुभाइ हुन् ।
दाजु ज्ञानबहादुरको बेलबारीमा ग्रिन कटेज नाम रहेको होटल रहेको छ । उक्त होटलमा गाँजाको गोप्य रूपमा कारोबार हुने गरेको प्रहरीको प्रारम्भिक चरणको अनुसन्धानदेखि खुलेको छ ।
