बिर्तामोड / झापाको कचनकवलमा मोटरसाइकल दुर्घटनाबाट एक जनाको मृत्यु भएको छ भने दुई जना घाइते भएका छन् । मृत्यु हुनेमा कचनकवल गाउँपालिका –६ विशाल बस्तीका ३८ वर्षीय सोम दहाल रहेका छन् ।
सोमबार राती ८ बजे बनियानी–बालुवाडी सडक खण्ड अन्तर्गत कचनकवलमा पश्चिमबाट पूर्व तर्फ आउँदै गरेको मे १० प ५३८९ र विपरीत दिशाबाट जाँदै गरेको मे ८ प २१३७ नम्बरको मोटरसाइकल एक आपसमा ठोकिँदा दुर्घटना भएको थियो ।
दुर्घटना परी मे ८ प २१३७ नम्बरको मोटरसाइकल चालक दहालको निधन भएको छ भने मे १० प ५३८९ नम्बरको मोटरसाइकल चालक कचनकवल गाउँपालिका –५ निवासी २५ वर्षीय करण राजवंशी, सोही मोटरसाइकलको पछाडि सवार कचनकवल –३ का १८ वर्षीय जयमति राजवंशी घाइते भएका थिए ।
घाइतेको बिर्तामोडस्थित बिएण्डसी अस्पतालमा उपचारको भइरहेको प्रहरी कार्यालय झापाका प्रहरी नायब उपरीक्षक (डिएसपी) राकेश थापाले जानकारी दिए ।
