बेलबारी / मोरङको बेलबारी स्थित एक घरमा सञ्चालनमा रहेको भरुवा बन्दुक बनाउने घरेलु उद्योगमा छापा मारी प्रहरीले बन्दुक र बन्दुक बनाउन प्रयोग गरिने सामाग्री सहित एक जनालाई पक्राउ गरेको छ ।
बेलबारी नगरपालिका १ का ५२ वर्षीय आश बहादुर लिम्बुको घरमा रहेको बन्दुक बनाउने घरेलु उद्योगमा छापा मारी उनी सहित बन्दुक र बन्दुक बनाउन प्रयोग गरिने सामाग्री प्रहरीले बरामद गरेको हो ।
आइतबार राती उनको घरमा छामा मारी भरुवा बन्दुक १ थान, बन्दुक बनाउन प्रयोग गरिने नाल २ थान, काठको बट ४ थान, फलामको पड्किने पाशो भएको बन्दुक १ थान, बारुद १ केजी, बन्दुकको नाल सफा गर्ने रड १ थान र फलामको काजो ३ थान पनि बरामद गरिएको जिल्ला प्रहरी कार्यालय मोरङले जानकारी गराएको छ ।
लिम्बुको घरबाट प्रहरीले ५ थान हरिणको सिङ पनि बरामद भएको जानकारी गराएको छ । पक्राउ परेका लिम्बुले विभिन्न धातु र बस्तु प्रयोग गरी भरुवा बन्दुक बनाउने र बिक्री गर्ने गरेको प्रहरीले बताएको छ ।
