बिर्तामोड / एक महिलासँग घुस लिएको आरोपमा दुई जना प्रहरी पक्राउ परेका छन् । पक्राउ पर्नेमा प्रसनि (असई) सञ्जीव बस्नेत र जवान सुरज खड्का रहेका छन् ।
उनीहरूलाई प्रहरी वृत्त बौद्धबाट खटिएको टोलीले त्रिभुवन अन्तर्राष्ट्रिय विमानस्थलबाट पक्राउ गरको हो । केन्द्रीय प्रहरी विशेष कार्यदल, कपनमा दरबन्दी भएका बस्नेत र खड्का त्रिभुवन अन्तर्राष्ट्रिय विमानस्थलमा कार्यरत थिए ।
उनीहरूले बौद्धकी एक महिलालाई ‘तपाइँसँग लागु औषध रहेको सूचना पाएका छौं, पैसा नदिए पक्राउ गर्छौ’ भनेर ९० हजार घुस लिएको प्रहरी प्रवक्ता (एसपी) रमेश बस्नेतले जानकारी दिए ।
पक्राउ गरिएका प्रहरी कर्मचारीलाई विभागीय कारवाही गरिने प्रवक्ता बस्नेतले बताए ।
