खोटाङ / खोटाङको रूपाकोट मझुवागढी नगरपालिका –३ कांडे का ३३ वर्षीय गिरीराज थापाको हत्यामा संलग्न रहेको आरोपमा प्रहरीले दुई जनालाई पक्राउ गरेको छ ।
पक्राउ पर्नेमा मृतक थापका भाइ २२ वर्षीय नारायण थापा र भतिजा १५ वर्षीय रुपन थापा रहेका छन् ।
गत भदौ ९ गते दिउसो ११ बजे घरबाट हिँडेका गिरीराज घर नफर्के पछि खोजतलास गर्ने क्रममा हिजो १० गते राती पौने २ बजे घर देखी अन्दाजी २०० मिटर बारीमा मृत अवस्थामा फेला परेका थिए ।
घटनाको जानकारी पाए लगतै जिल्ला प्रहरी कार्यालय खोटाङबाट खटिएको प्रहरी टोलीले घटनाको प्रकृती हेर्दा हत्या गरेको हुन सक्ने आशङ्कामा अनुसन्धान गर्न थालेको थियो ।
घटनाको प्रकृति, स्थानीयवासीको सोधपुछ तथा अनुसन्धानबाट प्रहरीले हिजै मृतकका भाइ नारायण र भतिजा रुपनलाई पक्राउ गरेको हो ।
पक्राउ परेका उनीहरूले घरायसी विवादका कारण भैँसी बाँध्ने प्लाष्टिकको डोरीले घाँटीमा कसी हत्या गरेको प्रारम्भिक अनुसन्धानमा खुलेको छ ।
घटनाको बारेमा थप अनुसन्धान भइरहेको र पक्राउ परेका दुवै जना विरुद्ध कर्तव्य ज्यान मुद्दामा कानुनी कारबाही अगाडि बढाइएको जिल्ला प्रहरी कार्यालय खोटाङले जनाएको छ ।
