मकवानपुर / मकवानपुरको भीमफेदीमा मालबाहक ट्रक दुर्घटना हुँदा एक जनाको मृत्यु भएको छ भने दुई जना घाइते भएका छन् । मृत्यु हुनेमा सिन्धुलीका २८ वर्षीय भोजराज बस्नेत रहेका छन् ।
भीमफेदी गाउँपालिका –१ सानुटारमा फलाम बोकेर काठमाडौँ जाँदै गरेको प्रदेश १–०२–००१ख ८७५९ नम्बरको ट्रक अनियन्त्रित भई राप्ती खोलामा खसेर दुर्घटना भएको थियो ।
दुर्घटनामा परी ट्रकमा सवार बस्नेतको घटनास्थलमै मृत्यु भएको जिल्ला प्रहरी कार्यालयका प्रवक्ता प्रहरी नायब उपरीक्षक जयश्वर रिमालले जानकारी दिए ।
दुर्घटनामा ट्रक चालक मोरङ सुन्दरहरैचाका राजन बाँस्कोटा र सहचालक सोही ठाउँका सरोज आचार्य घाइते भएकाले उनीहरूको हेटौँडास्थित चुरेहिल अस्पतालमा उपचार भइरहेको प्रहरीले जनाएको छ ।
