लहान / विभिन्न मुद्दामा अदालतबाट कैद तथा जरिवानाको सजाय पाएर फरार भएका पाँच जनालाई प्रहरीले पक्राउ गरेको छ ।
पक्राउ पर्नेमा लागूऔषध मुद्दामा आठ वर्ष कैद र तीन लाख १५ हजार रुपैयाँ जरिवाना सजाय तोकिएका सखुवानान्कारकट्टी गाउँपालिका –४ का २८ वर्षीय देवकुमार यादव र बहुविवाह मुद्दामा ११ महिना १५ दिन कैद र १० हजार रुपैयाँ जरिवाना सुनाइएका लहान नगरपालिका –१३ निवासी ३१ वर्षीय शिवशङ्कर महतो रहेका छन् ।
त्यसैगरी लेनदेन मुद्दामा दुई वर्ष कैद पाएका सिरहा नगरपालिका –२ का ५५ वर्षीय रामदेव साह, लेनदेन मुद्दामै पाँच महिना कैद सजाय पाएका सिरहा –१६ का ४० वर्षीय जाकिर मलङ्ग र चोरी मुद्दामा एक महिना कैद र ३० हजार रुपैयाँ जरिवाना सजाय ताकिएका सिरहा –१ का २३ वर्षीय सन्तोषकुमार कामती रहेका छन् ।
जिल्ला प्रहरी कार्यालयका प्रवक्ता प्रहरी नायब उपरीक्षक सुभास बुढाथोकीले पक्राउ परेकाहरूमाथि आवश्यक अनुसन्धान भइरहेको बताएका छन् ।
