बिर्तामोड / झापाको कनकाई नगरपालिका- १ स्थित कमलपुलमा मोटरसाइकल र अटो एकापसमा ठोकिएर दुर्घटना हुँदा एक जनाको मृत्यु भएको छ । मृत्यु हुनेमा बुद्धशान्ति गाउँपालिका -३ का ४० वर्षीय उपेन्द्र सिग्देल रहेका छन् ।
आज बिहान पूर्वबाट पश्चिम तर्फ जादै गरेको १-०१-००२ ह २६७ नम्बरको अटो र पश्चिमबाट पूर्वतर्फ आँउदै गरेको मे ७ प ८५९४ नम्बरको मोटरसाइकल एक आपसमा ठोकिँदा मोटरसाइकलमा सवार सिग्देलको मृत्यु भएको हो ।
टाउकोमा चोट लागी गम्भिर घाइते भएका सिग्देलको उपचारको क्रममा लाइफ लाइन अस्पताल दमकमा मृत्यु भएको प्रहरीले जनाएको छ । दुर्घटनामा परि घाइते भएका मोटरसाइकल चालक ५७ वर्षीय जीवन सुबेदीको अवस्था समान्य रहेको छ ।
यता अटो चालक ३० वर्षीय श्याम सुन्दर महतोलाई प्रहरीले नियन्त्रणमा लिएर घटनाबारे थप अनुसन्धान गरिरहेको जिल्ला प्रहरी कार्यालय झापाले जनाएको छ ।
