काठमाडौँ / झापामा सवारी दुर्घटना हुँदा दुईजनाको मृत्यु भएको छ । पूर्वपश्चिम राजमार्गको शिवसताक्षी- ९ स्थित भालुखोलामा पूर्वबाट पश्चिमतर्फ गइरहेको प्र१–०२–००क ३८७९ नम्बरको ट्रक र विपरीत दिशाबाट आइरहेको प्र१–०१–००च ७४८२ नम्बरको कार एकापसमा ठोक्किँदा दुई जनाको मृत्यु भएको हो ।
मृत्यु हुनेमा कारमा सवार मोरङ उर्लाबारी नगरपालिका–६ बस्ने ४५ वर्षीय गुरुचन चौधरी र उनकै छोरी १८ वर्षीया कुमकुम चौधरी रहेका रहेका छन् । उनीहरु बाबुछोरी हुन् । दुर्घटनामा अन्य ५ जना घाइते भएको जिल्ला प्रहरी कार्यालय झापाका सूचना अधिकारी प्रहरी नायब उपरीक्षक खगेन्द्रप्रसाद रिजालले जानकारी दिए ।
गुरुचनको छोरा १० वर्षीय विवेक चौधरी, रतुवामाई नगरपालिका–१० का १९ वर्षीय रिकेश न्यौपाने, उर्लाबारी–७ का ४० वर्षीया मुना साह घाइते भएको प्रहरी प्रवक्ता रिजालले बताए । उनका अनुसार घाइतेको बिर्तामोडस्थित बिएण्डसी अस्पतालमा उपचार भइरहेको र घटनाबारे थप अनुसन्धान भइरहेको छ ।
