रूपन्देही / रूपन्देहीमा राजश्व छलेर ल्याएको ८ क्विन्टल चिनी सहित २ जनालाई प्रहरीले पक्राउ गरेको छ । पक्राउ पर्नेमा अर्घाखाँचीको पाणिनी गाउँपालिकाका २२ वर्षीय मिनबहादुर रास्कोटी र कन्चन गाउँपालिका वडा नम्बर १ हात्तीबजारस्थित सुमन पन्त रहेको इलाका प्रहरी कार्यालय सालझण्डीका प्रमुख प्रहरी निरीक्षक जगन्नाथ मरासिनी जनाएका छन् । सोमबार राति १० बजे रूपन्देहीको सैनामैना नगरपालिका–१ भच्कैयाबाट उनीहरु पक्राउ परेका हुन् ।
सालझण्डीबाट पाल्पातर्फ जाँदै गरेको बलेरो पिकअपमा उक्त परिमाणको चिनी फेला पारी बरामद गरिएको प्रहरी निरीक्षक मरासिनीले जानकारी दिए ।बरामद गरिएको उक्त चिनी पन्तले सञ्चालन गरेको आरती किराना पसल तथा सावित्री ट्रेडर्सबाट ल्याएको खुलेको छ । त्यसपछि पसलका सञ्चालक पन्तलाई पनि पक्राउ गरेर अनुसन्धान सुरु गरिएको छ ।
