काठमाडौँ / परराष्ट्र मन्त्रालयले नेपाल भ्रमणमा आउन लागेका भारतीय प्रधानमन्त्री नरेन्द्र मोदीका भ्रमण तालिका सार्वजनिक गरेको छ ।
प्रधानमन्त्री शेरबहादुर देउवाको निमन्त्रणामा भारतीय प्रधानमन्त्री मोदी २ जेठमा बुद्ध जयन्तीको दिन सिधै लुम्बिनी आउँदैछन् ।
उनी भारतीय सीमावर्ती सहरबाट हेलिकप्टरमा लुम्बिनी उत्रने बताइएको छ । लुम्बिनी ओर्ले लगत्तै मोदीलाई परराष्ट्रमन्त्री नारायण खड्काले स्वागत गर्नेछन् ।
प्रधानमन्त्री देउवा र भारतीय प्रधानमन्त्री मोदीले मायादेवी मन्दिरमा आयोजित प्रार्थना सभामा भाग लिनेछन् । उनीहरूले गुम्बा क्षेत्रमा बौद्ध सांस्कृतिक तथा सम्पदाको शिलान्यास गर्ने कार्यक्रम रहेको छ ।
त्यसपछि दुवै प्रधानमन्त्री लुम्बिनी अन्तर्राष्ट्रिय बौद्ध ध्यान केन्द्र र सभा गृहमा आयोजित बुद्ध जयन्ती समारोहमा सरिक हुनेछन् ।
दुवै प्रधानमन्त्रीबीच लुम्बिनीमा द्विपक्षीय छलफल, नेपाल–भारत सहयोग सम्बन्धी समझदारीको आदान–प्रदान र आपसी चासोका विषयमा कुराकानी हुनेछ ।
