इलाम / इलामको सन्दकपुर गाउँपालिकामा नेकपा एमालेबाट अध्यक्ष पदका उम्मेदवारलाई सशस्त्र प्रहरीले नियन्त्रणमा लिएको छ । मौन अवधिमा दुवै जनालाई प्रचार- प्रसारको काममा लागेको आरोपमा उदय राईलाई प्रहरीले नियन्त्रणमा लिएको हो ।
बुधबार राति गाउँपालिकाको वडानम्बर ५ को जमुनामा पुगेका राईलाई आर्थिक चलखेल गर्न लागेको आरोपमा नियन्त्रणमा लिइएको स्थानीयवासीको भनाइ छ । उनीसहित वडासदस्य पदकी उम्मेदवार सीता कार्कीलाई समेत स्थानीयवासीले नियन्त्रणमा लिएका हुन् ।
जिल्लास्थित सशस्त्र प्रहरी बलका प्रमुख सुरेश सापकोटाले असुरक्षित हुने देखिएपछि सुरक्षाका लागि राखिएको बताए ।
मौन अवधिमा उम्मेदवार राईले मतदाताहरूलाई पैसालगायतका प्रलोभनमा पार्न लागेको भन्दै स्थानीयवासीहरूले विरोध गरेका थिए । आचारसंहिता उल्लङ्घन गरेको भन्दै उनलाई कारबाही गर्नसमेत उनीहरूले माग गरेका छन् ।
