ललितपुर / ललितपुरको भट्टेडाँडामा एमालेका वडा सदस्य उम्मेदवार चढेको गाडी तोडफोड भएको छ । युवा संघ नेपाल बागमती- ३ का अध्यक्ष सन्तोष खड्काका अनुसार बागमती गाउँपालिका- ३ बुलाका नारायण भोम्जन को गाडी तोडफोड भएको हो ।
कांग्रेसका कार्यकर्ताले गाडी तोडफोड गरेको उनले जिकिर गरेका छन् । उनले भने, ‘गाडी भिरालो ठाउँमा नभएकाले तत्काल दुर्घटना हुन पाएन । ब्रेकको तार निकालेको थाहा पाएपछि हामी रातभर गाडीमै बस्यौ ।’
खड्काले गाडीको झण्डा पनि निकालेर फ्याँकिएको बताए । उनले भने,‘साँझ ७ बजेर ३० मिनेटमा बुलाकी चौर पुगेका थियौं । राती १० बजेर ३० मिनेटमा फर्कँदा गाडी तोडफोड गरेको अवस्था रहेको भेट्टियो ।’
निर्वाचनको क्रममा भोट माग्नका लागि पार्टीका कार्यकर्ता गणेश जिम्माको घरमा गएको खड्काले बताए । उनले भट्टेडाँडा प्रहरी चौकीलाई राति नै सुरक्षाका लागि खबर गरेको उनले बताए ।
कांग्रेस गाउँपालिकाका सभापतिसमेत रहेका पालिकाका अध्यक्षका उम्मेदवार वीरबहादुर लोप्चनले यस विषयमा आफूलाई जानकारी नभएको बताए ।
