घोराही / पूर्व प्रधानमन्त्री तथा नेकपा माओवादी केन्द्रका अध्यक्ष पुष्पकमल दाहाल प्रचण्डलाई जुत्ता हान्छु भनेर सामाजिक सञ्जालमा लेख्ने दाङका एक जना पत्रकारलाई प्रहरीले पक्राउ गरेको छ ।
पक्राउ पर्नेमा तुलसीपुर उपमहानगरपालिका- ३ बस्ने ५२ वर्षीय यज्ञ बहादुर बूढा रहेको जिल्ला प्रहरी कार्यालय दाङका प्रमुख सुरेश काफ्लेले बताएका छन् ।
उनले बुढाले ‘हिजो सकेनन् चितवनवासीले, मेरी छोरीले चुनाव हारे देश दुर्घटनामा जान्छ भन्ने प्रचण्ड दाङ आए जुत्ता म हान्छु अब’ भनेर सामाजिक सञ्जालमा पोस्ट गरेका थिए । त्यसपछि जिल्ला प्रहरी कार्यालयको समन्वयमा इलाका प्रहरी कार्यालय तुलसीपुरबाट खटिएको प्रहरी टोलीले बुढालाई पक्राउ गरेको हो ।
चुनावी सभालाई सम्बोधन गर्न प्रचण्ड आज दाङको घोराही र तुलसीपुर जाने कार्यक्रम रहेको छ । प्रचण्डसँगै कांग्रेस सभापति तथा प्रधानमन्त्री शेरबहादुर देउवा पनि दाङ आउन लागेपछि प्रहरीले जिल्लाको सुरक्षा अवस्था कडा पारेको छ । चुनावी आमसभा स्थल शहीद मञ्च र त्यस आसपासका क्षेत्रमा प्रहरीहरूको तैनाथी बढाइएको छ ।
पक्राउ परेका बूढा माओवादी त्यागेर तुलसीपुरबाट एक अनलाइन सञ्चालन गर्दै आएका छन् । यसअघि यौन हिंसा पीडित राउटे युवतीको पहिचान सहितको तस्वीर र भिडियो आफ्नो युट्युब च्यानल र अनलाइनबाट सार्वजनिक गरेपछि उनलाई प्रहरीले पक्राउ गरेको थियो । एसपी काफ्लेले बुढामाथि विद्युतीय कारबाही ऐन अनुसार कारबाही हुने बताए ।
