काठमाडौं / प्रहरी महानिरीक्षक (आईजीपी) नियुक्तिविरुद्ध परेको मुद्दा हेर्दा हेर्दैमा राखिएको छ।
बुधबार न्यायाधीश सुष्मालता माथेमाको इजलासमा सुरु भएको प्रारम्भिक सुनुवाइ नसकिएपछि मुद्दा हेर्दाहेर्दैमा राखिएको हो।
रिटमा उनले सिंहको नियुक्ति बदर र मुद्दाको किनारा नलागेसम्म आफूलाई कायम मुकायम आईजीपी तोक्न माग गरेका छन्।
आइतबार मन्त्रिपरिषद्ले एआईजी धीरजप्रताप सिंहलाई आईजीपी नियुक्त गरेको थियो । वरियतामा जुनियरलाई आईजीपीमा नियुक्त गरेको भन्दै एआइजी विश्वराज पोखरेलले सोमबार सर्वोच्च अदालतमा रिट दायर गरेका थिए ।
सो रिट उपर इजलासमा पोखरेलको तर्फबाट मेघराज पोखरेल, सतिशकृष्ण खरेल, हरिहर दाहाल, महादेव यादवलगायतले बहस गरेका थिए ।
त्यस्तै सिंहको तर्फबाट महान्यायाधिवक्ता खम्मबहादुर खातीसहित वरिष्ठ अधिवक्ताहरू सुशील पन्त, भीमार्जुन आचार्य, टीकाराम भट्टराई लगायतले बहस गरेका थिए । बहसको क्रम अझै नसकिएकाले मुद्दा हेर्दाहेर्दैमा राखिएको हो ।
