बिर्तामोड / विराटनगर महानगरको उपप्रमुखमा नेकपा एमालेबाट उम्मेदवारी दिएकी शिल्पा कार्कीको उम्मेदवारी खारेजीको माग गर्दै सर्वोच्चमा रिट दर्ता भएको छ ।
निर्वाचन आयोग सहित कार्की विरुद्ध पनि आचारसंहिताको निर्देशिका उल्लंघन गरेको भन्दै रिट दर्ता भएको हो ।
मोरङको मुख्य निर्वाचन अधिकृतको कार्यालय, निर्वाचन आयोग काठमाडौं र एमाले उम्मेदवार कार्कीविरुद्ध विराटनगर महानगरका उपमेयरका उम्मेदवार अमरेन्द्र यादवले सर्वोच्चमा रिट दर्ता गराएका हुन् ।
कार्कीले कोशी अस्पताल विकास समितिको सदस्य पदबाट राजीनामा नदिई उम्मेदवारी दिएको भन्दै यादवले उम्मेदवारी खारेजी माग गर्दै सोमवार रिट दर्ता गराएका थिए ।
निर्वाचन कार्यालयमा उजुरी परेपछि २०७९ वैशाख ९ गते कार्कीले अस्पतालबाट राजीनामा दिएकी थिइन् । उनले ११ वैशाखमा मन्त्रालयमा राजीनामा दर्ता गरेको प्रतिलिपि निर्वाचन कार्यालयमा पेश गरेकी थिइन् ।
