काठमाडौं । सुनसरीबाट सुरु भएर मधेशका विभिन्न जिल्लासम्म फैलिएको पछिल्लो घटनाक्रमलाई लिएर राष्ट्रिय स्वतन्त्र पार्टी (रास्वपा) भित्रै गृहमन्त्री सुधन गुरुङको भूमिकामाथि प्रश्न उठ्न थालेको छ। मधेशका रास्वपा सांसदहरूले सभापति रवि लामिछानेसँग भेट गर्दै गृहमन्त्रीले प्रभावित क्षेत्रका जनप्रतिनिधिसँग आवश्यक समन्वय र संवाद नगरेको भन्दै असन्तुष्टि जनाएका हुन्। सांसदहरूको भनाइअनुसार, सुनसरी घटनापछि परिस्थिति संवेदनशील बन्दै जाँदा सम्बन्धित जिल्लाका सांसदहरूसँग गृहमन्त्रीले कुनै छलफल नगरेको गुनासो गरिएको छ। उनीहरूले यस्तो अवस्थालाई प्रभावकारी रूपमा व्यवस्थापन गर्न सरकारको समन्वय कमजोर देखिएको धारणा पनि राखेका छन्। सांसदहरूको गुनासो सुनेपछि सभापति रवि लामिछानेले पछिल्लो घटनाक्रमप्रति आफू गम्भीर रहेको बताउँदै सामाजिक सद्भाव कायम राख्न आवश्यक परे आफैँ मधेश जाने तयारी रहेको बताएका छन्। पछिल्लो भेटघाटले मधेशको सुरक्षा अवस्था, सरकारको समन्वय शैली र रास्वपाको आन्तरिक चासोलाई नयाँ राजनीतिक बहसको विषय बनाएको छ।