काठमाण्डौ । रौतहटको चन्द्रपुर स्थित पूर्वपश्चिम राजमार्गको धन्सार-लमाहा खण्डमा मङलबार बिहान जिप दुर्घटना हुँदा चालकसहित ८ जनाको मृत्यु भएको छ।
दुर्घटनामा ५ जना घाइते भएका इलाका प्रहरी कार्यालय चन्द्रनिगाहपुरले जनाएको छ। बाराको गढीमाई दर्शन गरेर सिराहा तर्फ जाँदै गरेका दर्शनार्थी चढेको बा १६ च ३१६२ नम्बरको जिप दुर्घटना भएको हो।अनियन्त्रित भई रोडबाट तल साइडको रुखमा ठोक्किएर दुर्घटना हुँदा ठुलो क्षति भएको प्रहरीले जनाएको छ।
दुर्घटनामा परी सिराहा अर्नामा गाउँपालिका-३ बंठियाटोलका ६० वर्षीया लरुवती देवी महरा, ३० वर्षीया उर्मिला महरा, ५० वर्षीया रामकुमारी महरा, ५५ वर्षीया महगीं देवी महरा, ६२ वर्षीया फुलमन्ति देवी चमार, ६० वर्षीया रामकुमारी देवी महरा, ३० वर्षीया सकुन्तला देवी महरा र ४० वर्षीय स्कर्पिओ चालक श्रीकुमार यादवको मृत्यु भएको हो।
दुर्घटनामा अर्नामा ३ कै ३० वर्षीया राधा राम, सोही ठाउँका उमेश रामका २ वर्षीय छोरा आर्यन राम, २५ वर्षीया देवकुमारी महरा, उनका ७ वर्षीय छोरा रितिक महरा र ६० वर्षीया कन्यादेवी महरा घाइते भएका छन् । उनीहरुको उपचार भइरहेको छ । मृतकको शव अहिले चन्द्रपुरस्थित सरकारी अस्पतालको शव गृहमा राखिएको छ ।
