भैरहवा । गौतमबुद्ध अन्तर्राष्ट्रिय विमानस्थलबाट ९ हजारभन्दा बढी यात्रुले सिधा उडान, अवतरण र ट्रान्जिट सुविधा लिएका छन् । गत नोभेम्बर ३ देखि ३०सम्म यी यात्रुले विमानस्थल प्रयोग गरेका हुन्।
यो विमानस्थलबाट कुवेत–भैरहवा–कुवेत तथा बैंकक–भैरहवा–बैंकक सिधा उडान भइरहेको छ भने दुबई–भैरहवा–काठमाण्डू –दुबई तथा दोहा–भैरहवा–काठमाण्डू –दोहा ट्रान्जिट उडान भइरहेको छ । २८ दिनमा सिधा उडानमार्फत २ हजार २ सय २७ यात्रु भैरहवा ओर्लंदा २ हजार ५२ जना यहाँबाट प्रस्थान गरेको नागरिक उड्डयन प्राधिकरण भैरहवाका सूचना अधिकारी विनोदसिंह रावतले जानकारी दिनुभयो । त्यसैगरी यो विमानस्थलमार्फत ४ हजार ९ सय ३२ जनाले ट्रान्जिट सेवा लिएका छन् । फ्लाई दुबई, कतार एयरवेज र नेपाल एयरलाइन्सले ट्रान्जिट उडान गर्दै आएका छन l
रावतका अनुसार सबैभन्दा बढी कुवेतबाट आउने र त्यहाँ जाने यात्रु छन्। जजिरा एयरवेजबाट १ हजार १ सय ५४ जना यात्रु भैरहवा ओर्लंदा १ हजार ६ सय ३१ जना कुवेत प्रस्थान गरेका छन् । जजिराले यो गन्तव्यमा साताको ३ उडान गर्दै आएको छ । यसको उडान नियमित भइरहेको छ । त्यसैगरी हप्ताको दुई उडान सुरु गरेको थाई एयर एसियाले भने लोडका कारण साताको एक उडानमात्र गर्दै आएको सूचना अधिकारी रावतले बताउनुभयो। थाईबाट अहिलेसम्म ७२ जना यात्रु आउँदा ३ सय ७५ यात्रु सिधै बैंकक उडेका छन् ।
कतार एयरवेजले उडान तालिका ३० नोभेम्बरसम्मका लागि स्वीकृत गराएकोमा डिसेम्बर एकदेखि उडान बन्द गरेको छ । अब फेरि उडान गर्छ या गर्दैन निश्चित छैन । अन्य कम्पनीले भने नियमित तालिकाअनुसार नै उडान गरिरहेका छन् । जजिराले कुवेत हुँदै दुबई, दोहा, बहराइनलगायत गन्तव्यबाट समेत ट्रान्जिट सेवा उपलब्ध गराएपछि दुबई तथा दोहामा रहेका यात्रु पनि जजिराबाट सिधै भैरहवा आउने क्रम बढेको छ ।अन्तर्राष्ट्रिय उडान पुनः सुचारु भएपछि आशाको सञ्चार भएको पर्यटन व्यवसायीले बताएका छन् ।
