चितवन— जाडो मौसम सुरु भए पनि चितवनसहित नेपालका विभिन्न स्थानमा बाहिरी देशबाट पाहुना चरा आउन थालेका छन् । अन्य देशमा धेरै जाडो बढेपछि चिसो छल्न नेपालमा चरा आएको चराविज्ञ डा. हेमसागर बरालले जानकारी दिए ।
धेरै जसो चरा आइसकेका र केही सङ्ख्यामा मात्र नेपाल आउन बाँकी रहेको विज्ञ बरालले बताए । यसरी नेपाल आएका चरा चितवन, शुक्लाफाँटा निकुञ्ज क्षेत्र, बर्दिया, पोखरा, हिमाली केही भाग, कपिलवस्तु, कोशी क्षेत्रलगायतमा आएको उनले बताए ।
आगन्तुक चराका रूपमा आएका चरा नेपालमा केही समय बसेर पुनः फर्किने गरेका छन् । यसरी आउने चरामा हाँस प्रजातिका दुई दर्जनभन्दा बढी, पानीमा बस्ने प्रजातिका, खुट्टा लामो हुने प्रजातिका र कर्याङकुरुङलगायतका चरा रहेको उनले बताए ।
नेपालमा लोप हुने अवस्थामा पुगेको बगाले बगेडी चरा पोखरामा देखिएको भन्दै उनले केही चराविज्ञले कुन कुन जातिका चरा देखा परेका छन् भनेर जानकारी लिन थालेको बताए । हिमाली क्षेत्र, पोखरा, पश्चिम नेपाल र चितवनमा सामान्य जानकारी र सङ्ख्याका विषयमा विवरण सङ्कलन गर्दै गरेको उनले बताए ।
नेपालबाहिर अजरबैजान, पूर्वी युरोप, दक्षिण कोरिया, साइबेरिया, चीन, रुसलगायतबाट चरा आएको डा. बरालले जानकारी दिए ।
नेपाल पन्छीविज्ञ सङ्घ बागमती प्रदेशका संयोजक वासु बिडारीले चितवनको राप्ती, नारायणी र रिउखोलामा ४० भन्दा बढी प्रजातिका चरा आइसकेको जानकारी दिनुभयो । अहिले नदी किनारमा आगन्तुक चरा देखिन थालिसकेका छन् । यीसँगै चरा हेर्नका लागि आउने पर्यटकसमेत बढेका छन् ।
नेपाल आएका विदेशी चितवन आउने र उनीहरूको रोजाइ वन्यजन्तुसँगै चरा अवलोकन पनि रहेको बताए ।
चरा हेर्नका लागि निकुञ्जको बटुली पोखरी चर्चित रहेको उनको भनाइ छ । विभिन्न देशमा जाडो बढेसँगै हिउँ पर्ने र नदी हिउँले ढाकिने हुँदा आहाराको खोजीमा चरा आउने गरेको उनले जानकारी दिए। यो समयमा १५० देखि १६० प्रजातिका चरा चितवन आउने गरेका छन् ।
अहिले आएका चराले बच्चा कोरल्ने काम गर्दैनन् । गर्मी सुरु भएसँगै यी चरा फर्कने गर्छन् । तराईको कोशीटप्पुदेखि कर्णालीसम्म पानीमा आश्रित चरा नेपाल आउने गरेको बताउँदै उनले चरा हेर्न नारायणी नदी, राप्ती नदी सबैभन्दा उपयुक्त रहेको बताए ।
