काठमाडौं–मकवानपुरको बागमती गाउँपालिका–४ हरामिटोलस्थित मदन भण्डारी लोकमार्गमा आज साँझ स्कुटरको ठक्करबाट एक महिलाको मृत्यु भएको छ। हेटौंडाबाट सिन्धुलीतर्फ जाँदै गरेको बा.प्र. ०३–००४ प ७२७६ नम्बरको स्कुटरले ठक्कर दिँदा ४८ वर्षीया गङ्गा पहरीको मृत्यु भएको हो। ठक्करबाट पहरीका ५ वर्षीय अनुप पहरी घाइते भएका छन्।
गम्भीर घाइते गङ्गा पहरीलाई उपचारका लागि हेटौंडास्थित चुरेहिल अस्पतालमा भर्ना गरिएको थियो, जहाँ उपचारकै क्रममा उनको मृत्यु भयो। घाइते अनुपको उपचार सोही अस्पतालमा भइरहेको छ। स्कुटर र चालक हेटौंडा उपमहानगरपालिका ६ चौघडाका २६ वर्षीय अनुपकुमार क्षेत्रीलाई प्रहरीले नियन्त्रणमा लिई थप अनुसन्धान गरिरहेको छ।
