वनमन्त्री ठकुरी ब्राजिल प्रस्थान, ३० गते फर्किने

काठमाडौं–वन तथा वातावरणमन्त्री ऐनबहादुर शाही ठकुरी आज राति नेपाली प्रतिनिधिमण्डलको नेतृत्व गर्दै ब्राजिलको रियो दि जेनेरियो सहरमा हुने ‘वन प्लानेट नेटवर्क फोरम’को सम्मेलनमा प्रस्थान गरेका छन् । 

ब्राजिल सरकार र संयुक्त राष्ट्रसंघअन्तर्गत वातावरण संस्था ‘युएनइपी’को संयुक्त आयोजनामा हुने यो सम्मेलन भदौ २७ र २८ गतेसम्म जारी रहनेछ । सम्मेलनको उद्देश्य ‘दिगो उत्पादन र चलायमान अर्थतन्त्र अवधारणा’लाई सम्बोधन गर्दै समझदारी र अन्तर्राष्ट्रिय सहकार्य बढाउने छ । 

मन्त्री ठकुरीले भदौ २८ गते सम्मेलनमा सम्बोधन गर्ने कार्यक्रम रहेको छ । सम्मेलन जलवायु परिवर्तन र अन्य सङ्क्रमण अवस्थाका बीच सहकार्य र समझदारीको विकासमा केन्द्रित रहनेछ । मन्त्री ठकुरी भदौ ३० गते स्वदेश फर्कने कार्यक्रम छ ।