तेह्रथुम / तेह्रथुमको लालीगुँरास नगरपालिका- ९ स्थितबाट चोरीमा संलग्न १ जनालाई चोरी गरेको सुनका गरगहना र नगद सहित प्रहरीले पक्राउ गरेको छ । पक्राउ पर्नेमा झापा मेचीनगर नगरपालिका- ११ घर बताउने ३५ वर्षीय रोशन तामाङ रहेका छन ।
तामाङले ज्येष्ठ २५ गते बुधबार दिउसो फेदाप गाउँपालिका- २ तेह्रथुमका प्रेम प्रसाद भट्टराईको घरमा कोही नभएको मौका पारी ढोका फोडी कोठा भित्र काठको बाकसमा राखेको सुनको बिभिन्न गरगहनाहरू ५ तोला, ५ आना र नगद १ हजार रुपैयाँ सहित चोरी गरी फरार भएका थिए ।
चोरी भएको सूचना पाए लगतै प्रहरी चौकी योयाक्जुङ र जिल्ला प्रहरी कार्यालय तेह्रथुमबाट खटिएको प्रहरी टोलीले खोज तलासको क्रममा हिजो बिहान लालिगुराँस नगरपालिका- ९ काँडे स्थितमा लुकिछिपि बसेको अवस्थामा चोरी भएका सम्पूर्ण गरगहना र नगद सहित तामाङलाई पक्राउ गरेको हो ।
पक्राउ परेका तामाङको सम्मानित जिल्ला अदालत तेह्रथुमबाट म्याद थप गरी थप अनुसन्धान भइरहेको जिल्ला प्रहरी कार्यालय तेह्रथुमले जनाएको छ ।
