काठमाडौं  / काठमाडौंको लैनचौरस्थित अमृत साइन्स क्याम्पस (अस्कल) मा एमाले निकट विद्यार्थी संगठन अनेरास्ववियुका इकाई कमिटी सहसचिव पंकज पाण्डेले उपप्राध्यापक दिवाकर पाण्डेलाई कुटपिट गरेका छन् । 

खेलकुद तथा विद्यार्थी कल्याणकारी विभाग प्रमुख रहेका उपप्राध्यापक दिवाकरलाई पंकजले सल्लाह गर्नुछ भनेर एकान्तमा लगेर आइतबार कुटेको कलेजका प्रमुख लोकबहादुर बरालले बताए । 
अनेरास्ववियुका विद्यार्थीहरूमाथि दर्ता भएको कीर्ते मुद्दा फिर्ताका लागि दबाब दिन उपप्राध्यापकमाथि कुटपिट भएको हो ।
अनेरास्ववियुका पूर्व इकाई प्रमुख कमलराज जोशीले बिएससी सीएसआईटीको भर्ना प्रक्रियामा कीर्ते नामावली तयार गरेका थिए । त्यही विषयमा क्याम्पस प्रशासनले कीर्ते मुद्दामा अनेरास्ववियुका जोशीसँगै रुद्रहरि पोखरेलविरुद्ध किटानी जाहेरी दिएको छ ।
उनीहरु विरुद्ध काठमाडौं जिल्ला अदालतले पक्राउ पुर्जी पनि जारी गरिसकेको छ । सोही मुद्दा फिर्ता गराउन उपप्राध्यापक पाण्डेलाई दबाब दिएको तर, उनले कुनै भूमिका नखेलेपछि कुटपिट गरेको एक प्राध्यापकले बताए ।उपप्राध्यापकमाथि भएको आक्रमणको अन्य विद्यार्थी सङ्गठनले संयुक्त विज्ञप्ति जारी गर्दै आपत्ति जनाएका छन् ।