झापा / दार्चुलामा एकल महिलालाई आगो लगाएर हत्या गरेको आरोपमा २ जनालाई प्रहरीले पक्राउ गरेको छ । जिल्लाको शैल्यशिखर नगरपालिका -१ बारिलकी ४० वर्षीया अनिभा खडायतको आगो लगाएर हत्या भएको हो । हत्या आरोपमा पक्राउ पर्नेमा सोही स्थानका बिरेन्द्र खडायत र तुला खडायत रहेको जिल्ला प्रहरी कार्यालय दार्चुलाका डीएसपी प्रतीक विष्टले जानकारी दिए ।
मंगलबार राति नै घर नजिकैको खरको लुटोमा आगो लगाएर महिलाको हत्या भएको प्रहरीले जनाएको छ । घटनाको अनुसन्धानको लागि प्रहरी चौकी बलाँच, इलाका प्रहरी कार्यालय गोकुलेश्वरबाट टोली परिचालन गरिएको छ । मृतकको श्रीमानको ७–८ वर्ष पहिले नै निधन भएको र २ छोरी र १ छोरा रहेको प्रहरीले जनाएको छ ।
