बाँके / नेपालको कुनै पनि क्यासिनोमा विदेशी बाहेक नेपालीलाई प्रवेश गर्न निषेध भएपनि क्यासिनोहरूले निर्वाध रूपमा नेपालीलाई प्रवेश गराई जुवा खेलाउने काम गरिरहेका छन् ।
यस्तै क्यासिनोमा नेपालीलाई प्रवेश गराई जुवा खेलाउने कार्य भइरहेको विशेष सूचनाका आधारमा बाँके प्रहरीले एकै पटक नेपालगञ्जका सात क्यासिनोमा छापा मारेको छ ।
छापा मार्ने क्रममा नेपालगञ्जको धम्बोझी चोकस्थित होटल सिटी प्यालेसभित्र सञ्चालनमा रहेको सिटीइ गेमिङ क्लब क्यासिनोबाट छ जना नेपालीलाई पक्राउ गरेको जिल्ला प्रहरी कार्यालय बाँकेका प्रहरी नायब उपरीक्षक मधुसुदन न्यौपानेले जानकारी दिए ।
न्यौपानेका अनुसार उनीहरूलाई थप अनुसन्धानका लागि जिल्ला प्रहरी कार्यालयमा राखिएको छ । गत आइतबार पनि सोही क्यासिनोबाट नेपालगञ्जका सात जनालाई प्रहरीले नियन्त्रणमा लिएको थियो ।
