बिर्तामाेड / सङ्खुवासभाको मादी नगरपालिका –१ खोला गाउँमा एकै परिवारका ६ जनाको हत्या गरिएपनि सोही परिवारका ५ जना जीवित नै रहेको खुलेको छ ।
आइतबार राती भएको घटनाको समयमा घरमा नै रहेका ९० वर्षीय वृद्ध बौद्धमान कार्की वृद्ध जीवित नै भेटिएका छन् । जीवित नै भेटिएका वृद्ध कान नसुन्ने र आँखा समेत नदेख्ने भएकाले हत्यामा संलग्नले उनलाई जीवित नै छाडेको अनुमान गरिएको छ ।
खोला गाउँका तेज बहादुर कार्कीको घरमा घटना भएको समयमा रहेका एक जना वयोवृद्ध परिवारका सदस्य बाहेक सबैको हत्या भएको भएपनि परिवारका अन्य सदस्य घरमा नरहेकाले बाँच्न सफल भएको खुलेको हो ।
मृतक तेजबहादुर दुई छोरा जेठो रमेश कार्की र कान्छो वैदेशिक रोजगारका क्रममा विदेशमा नै रहेको खुलेको छ । जेठो छोरा रमेश मलेसियामा र कान्छो नरेश दुबईमा रहेको अनुसन्धानका क्रममा खुलेको जिल्ला प्रहरी कार्यालय संविधानसभाले जनाएको छ ।
याे पनि –सङ्खुवासभा हत्याकाण्ड : एकै परिवारका छ जनाको विभत्स हत्या
मलेसियामा रहेका जेठा छोरा रमेशकी श्रीमती र छोराछोरी भने घटनाका समयमा घरमा नै रहेकाले हत्या भएको छ । तर कान्छो छोरा नरेशकी श्रीमती र एक छोरा भने झापा गएको अवस्थामा घटना भएकाले जोगिन सफल भएका छन् ।
परिवारका जेष्ठ सदस्य बौदमान जोगिन सफल भएपनि उनकी ८४ वर्षीया श्रीमती पार्वती कार्कीको भने हत्या भएको छ ।
याे पनि –एकै परिवारका ६ को हत्या
५२ वर्षीय तेज बहादुरको शव घर नजिकै सडकमा र ८४ वर्षीया पार्वतीको शव घर भित्रै भेटिएको थियो । त्यसैगरी तेजबहादुरकी ५२ वर्षीया श्रीमती कमला कार्की र ३२ वर्षीया बुहारी रञ्जनाको शव घर नजिकैको खोल्सामा भेटिएको छ । रमेश र रन्जनाका ११ वर्षीय छोरा दिपेन र ७ वर्षीया छोरी गोमाको शव भने घर नजिकैको मकैबारीमा भेटिएको हो ।
घटना स्थलमा अनुसन्धान विज्ञ , फरेन्सिक विज्ञ र कुकुर समेत पठाइएकाले मंगलबार मात्रै शव उठाउने तयारी गरिएको जिल्ला प्रहरी कार्यालयले जनाएको छ ।
मृतकका शव छरिएको अनि फरक – फरक स्थानमा भेटिएकाले घटना स्थलमा पुगेका प्रहरीले भगाई – भगाई हत्या गरेको हुन सक्ने बताएका छन् । जीवित रहन सफल वृद्ध बौद्धमानले भने घटनास्थल पुगेका प्रहरीलाई आफूले केही पनि थाहा नै नपाएको प्रारम्भिक बयान दिएका छन् ।
