बिर्तामोड / बालाजु औद्योगिक क्षेत्रको आगलागी नियन्त्रणमा लिन कठिन भएको छ ।
औद्योगिक क्षेत्रमा रहेको बिस्कुट फ्याक्ट्रीमा शुक्रबार राति दुई बजेदेखि सुरु भएको आगलागी नियन्त्रणमा आउन नसकेको प्रहरी वृत्त बालाजुले बताएको छ ।
प्रहरीका अनुसार बिहान हेलिकप्टरबाट पानी हालेर आगलागी नियन्त्रणमा लिने प्रयास गरे पनि नियन्त्रणमा आएको छैन ।
सिम्रिक एयरको हेलिकप्टरबाट आगलागी भएको ठाउँमा पानी हालिएको तर घरभित्रको आगलागी भएकोले नियन्त्रण लिन सम्भव नभएको प्रहरीको भनाइ छ ।
१९ वटा पानी ट्याङ्कर ९ वटा वारुणयन्त्र रातिदेखि नै आगो निभाउन खटाइए पनि आगो नियन्त्रणमा नआएपछि बिहान हेलिकप्टरको प्रयोग गरिएको थियो । हेलिकप्टरबाट पनि आगो नियन्त्रणमा लिन नसकिएको प्रहरीको भनाइ छ ।
आगलागी नियन्त्रण नभएकोले क्षतिको विवरण पनि आइसकेको छैन । आगलागीको कारण पनि नखुलेको प्रहरीले जनाएको छ ।
