काठमाडौं । मलेसियामा हुने एसीसी प्रिमियर कपलाई नेपालले केवल अर्को क्रिकेट प्रतियोगिताका रूपमा होइन, २०२७ को एकदिवसीय एसिया कपमा पुग्ने महत्वपूर्ण अवसरका रूपमा लिएको छ।
अगस्ट ३० देखि सुरु हुने प्रतियोगिताका लागि नेपाल क्रिकेट संघ (क्यान)ले शुक्रबार १४ सदस्यीय टोलीलाई बिदाइ गरेको छ। सन्दीप लामिछानेको कप्तानीमा रहेको नेपाली टोली मलेसिया जानुअघि केही दिन भारतमा प्रशिक्षण गर्नेछ।
नेपालले प्रतियोगितामा समूह चरणमै चार खेल खेल्नेछ। समूहमा आयोजक मलेसियासहित साउदी अरेबिया, बहराइन र हङकङ रहेका छन्। नेपालले सेप्टेम्बर १ मा साउदी अरेबियासँग पहिलो खेल खेल्नेछ।
त्यसपछि सेप्टेम्बर ३ मा बहराइन, सेप्टेम्बर ५ मा मलेसिया र सेप्टेम्बर ७ मा हङकङसँग प्रतिस्पर्धा गर्ने तालिका छ।
प्रतियोगितामा १० टोली सहभागी छन् र दुई समूहमा विभाजन गरिएको छ। प्रत्येक समूहका शीर्ष दुई टोली सेमिफाइनलमा पुग्नेछन्।
तर नेपालको लक्ष्य सेमिफाइनल पुग्नुमात्र होइन। प्रतियोगिताका शीर्ष तीन टोलीले सन् २०२७ मा बंगलादेशमा आयोजना हुने एकदिवसीय एसिया कपमा स्थान बनाउनेछन्। त्यसैले मलेसियाको मैदानमा हुने प्रत्येक खेल नेपालको एसिया कप यात्राका लागि निर्णायक बन्नेछ।
सन्दीपको नेतृत्वमा रहेको टोलीमा आसिफ शेख, अर्जुन कुमाल, रोहित पौडेल, देव खनाल, दीपेन्द्रसिंह ऐरी, सन्दीप जोरा, बसिर अहमद, ईशान पाण्डे, गुलशन झा, शेर मल्ल, ललित राजवंशी, करण केसी र हेमन्त धामी छन्।
नेपालका लागि समूह चरणको सबैभन्दा महत्वपूर्ण चुनौती लगातार चार खेलमा लय कायम राख्नु हुनेछ। सुरुवाती खेलमै राम्रो प्रदर्शन गर्न सके सेमिफाइनलको बाटो सहज बन्नेछ।
अब मलेसियामा नेपालको लक्ष्य स्पष्ट छ-प्रिमियर कप जित्ने अभियानसँगै एसिया कपको टिकट सुरक्षित गर्ने।अब मलेसियामा नेपालको लक्ष्य स्पष्ट छ—प्रिमियर कप जित्ने अभियानसँगै एसिया कपको टिकट सुरक्षित गर्ने।
