काठमाडौं । मुलुकको समसामयिक राजनीतिक घटनाक्रम र प्राकृतिक विपत्तिको चुनौतीबीच राष्ट्रपति रामचन्द्र पौडेल र प्रमुख प्रतिपक्षी दल नेपाली कांग्रेसका संसदीय दलका नेता भीष्मराज आङ्देम्बे बीच शीतल निवासमा महत्वपूर्ण भेटवार्ता भएको छ।
सोमबार बिहान करिब एक घण्टा भएको भेटमा संसद्को वर्तमान अवस्था, राजनीतिक स्थिरता, कानुन निर्माणको गति तथा देशका विभिन्न क्षेत्रमा आएको बाढी–पहिरोबाट उत्पन्न संकटका विषयमा विस्तृत छलफल भएको आङ्देम्बेको सचिवालयले जनाएको छ।
भेटका क्रममा आङ्देम्बेले बाढी–पहिरो प्रभावित क्षेत्रको अवस्था, उद्धार, राहत वितरण र पुनस्र्थापनामा देखिएका चुनौतीबारे राष्ट्रपति पौडेललाई जानकारी गराएका थिए। त्यसको जवाफमा राष्ट्रपति पौडेलले राजनीतिक दलहरूबीच सहकार्य र संसद्को प्रभावकारी भूमिका अहिलेको आवश्यकता भएको उल्लेख गर्दै जनतासँग प्रत्यक्ष जोडिएका कानुन निर्माणलाई प्राथमिकता दिन आग्रह गरेका छन्।राष्ट्रपतिले प्राकृतिक विपत्तिको सामना गर्न सरकार, राजनीतिक दल र सम्बन्धित सबै निकायबीच बलियो समन्वय आवश्यक रहेको पनि बताएका छन्। बाढी–पहिरो प्रभावित नागरिकको उद्धार, राहत र पुनस्र्थापनामा एकजुट भएर काम गर्नुपर्ने उनको जोड थियो। राजनीतिक समीकरण परिवर्तन र संसदीय गतिविधि तीव्र भइरहेका बेला भएको यो भेटलाई अर्थपूर्ण रूपमा हेरिएको छ।
