काठमाडौं — भारतीय क्रिकेटमा एकाएक हलचल मच्चिएको छ। कप्तान रोहित शर्माले टेस्ट क्रिकेटबाट सन्यास लिएका छन्, त्यो पनि पूर्वसूचना बिना। मंगलबार साँझ भारतीय क्रिकेट बोर्ड (बिसिसिआई) को कार्यालयमा आयोजित विशेष कार्यक्रममा क्रिकेटका प्रतिष्ठित व्यक्तिहरू भेला भएका थिए। कार्यक्रममा सचिन तेन्दुलकर र सुनील गावस्करको नाममा कोठा उद्घाटन गरिएको थियो। दुवै दिग्गज स्वयं पनि कार्यक्रममा उपस्थित थिए।
कार्यक्रममा बिसिसिआई अध्यक्ष रोजर बिन्नी, सचिव देबजित सैकिया, महाप्रबन्धक अबे कुरुविल्ला र राष्ट्रिय चयन समिति अध्यक्ष अजित अगरकरसमेत सहभागी थिए। तर, रोहित शर्मा भने कार्यक्रममा देखिएनन्, किनभने सोही साँझ मुम्बई इन्डियन्सको खेल रहेकोले उनी व्यस्त थिए।
तर सबैलाई चकित पार्दै, भोलिपल्ट उनले टेस्ट क्रिकेटबाट सन्यासको घोषणा गरे। उनले पहिलोपटक बिसिसिआई का उच्च अधिकारीहरूलाई इमेलमार्फत जानकारी गराएको र त्यसपछिमात्र सामाजिक सञ्जालमार्फत सार्वजनिक रूपमा घोषणा गरेको विश्वास गरिएको छ।
चयनकर्ता अध्यक्ष अगरकर घटनाको समयमा क्रिकेट क्लब अफ इन्डियामा फोनमा कुरा गरिरहेको देखिएको थियो। त्यो संवाद रोहितसँग थियो कि थिएन, भन्ने स्पष्ट छैन, तर उनको निर्णयबारे चयनकर्तालाई पनि पहिले जानकारी नहुँदा, यो पूर्णतः अप्रत्याशित देखिएको छ।
यो निर्णयसँगै जुन–जुलाईमा इंग्ल्यान्डविरुद्ध हुने पाँच टेस्टको श्रृंखलामा रोहित खेल्ने कि नखेल्ने भन्ने अड्कलबाजी सकिएको छ। तर, उनले किन यस्तो निर्णय गरे भन्नेमा प्रश्नहरू उठिरहेका छन्।
रिपोर्टहरूका अनुसार, चयनकर्ताहरू रोहितलाई टेस्ट कप्तानको रूपमा निरन्तरता दिन इच्छुक थिएनन्। मंगलबार भएको छलफलमा कप्तानीको विषयमा चर्चा भयो कि भएन भन्ने प्रष्ट छैन, तर यसले सम्भावित दबाबको संकेत गर्छ।
रोहितले यसअघि आईपीएलको प्रदर्शनपछि टेस्ट करियरबारे निर्णय लिने बताएका थिए। यस सिजनमा उनले ११ खेलमा जम्मा ३०० रन मात्रै बनाएका छन्, जुन उनी स्वयंका लागि सन्तोषजनक नहुन सक्छ। साथै, उनका विश्वासिला सपोर्ट स्टाफ सदस्यहरूको करार नवीकरण नगरिएकोले पनि उनी निराश भएको अनुमान गरिएको छ।
सोशल मिडियामार्फत रोहितले एकदिवसीय (ओडीआई) क्रिकेट खेलिरहने र कप्तानी पनि सम्हालिरहने स्पष्ट पारेका छन्। उनले अभिषेक नायरसँग ब्याटिङ र फिटनेसमा काम गर्दै सन् २०२७ को विश्वकपसम्म खेल्ने लक्ष्य लिएका छन्।
अब टेस्ट कप्तानीका लागि सबैभन्दा बलियो दाबेदार शुभमन गिललाई मानिएको छ। उनी यस सिजन गुजरात टाइटन्सको कप्तान छन् र उनको नेतृत्वको खुलेर प्रशंसा गरिएको छ।
“गिल टिमलाई राम्रोसँग अगाडि बढाइरहेका छन्। उनले युवाहरूलाई सल्लाह दिइरहेका छन्, ड्रेसिङ रूममा प्रभावशाली उपस्थिति छ, र मैदानमा निकै सक्रिय छन्।”
