काठमाण्डौ । मेडिकल व्यवसायी दुर्गा प्रसाईंले विभिन्न अदालतमा हालेका दुई रिट खारेज भएको छ ।
रिट खारेज भएसँगै प्रसाईं तत्काललाई प्रहरी हिरासतमै रहनेछन् भने बैंक/वित्तीय संस्थाले उनीबाट ऋण असुली प्रक्रिया अघि बढाउन पाउने भएका छन् ।
कम्बोडियाको एक दूरसञ्चार कम्पनीमा प्रधानमन्त्री तथा नेकपा (एमाले) का अध्यक्ष केपी शर्मा ओलीको अर्बौं रुपैयाँ लगानी रहेको बताएपछि नेपाल प्रहरीको केन्द्रीय अनुसन्धान ब्यूरो (सीआईबी) को टोलीले प्रसाईंलाई मंसिर ४ गते भक्तपुरस्थित निवासबाटै पक्राउ गरेको थियो ।
प्रसाइलाई प्रहरीले विद्युतीय कारोबार ऐन, २०६३ को दफा ४७ बमोजिम अनुसन्धान निम्ति पक्राउ गरी अन्य कसुर पनि लगाउन खोजेको छ ।
प्रहरीले साइबर अपराधबाहेक अन्य अनुसन्धानका लागि भन्दै म्याद थप गरेपछि उनका छोरा निराजन प्रसाईंले पुस २ गते बन्दीप्रत्यक्षीकरणको रिट दायर गरेका थिए । रिटमा आफूलाई गैरकानूनी रूपमा हिरासतमा लिएकाले मुक्त हुन पाउनुपर्ने माग थियो ।
सर्वोच्च अदालतका न्यायाधीशहरू नित्यानन्द पाण्डेय र महेश शर्मा पौडेलको इजलासले प्रसाईंको रिट खारेज गरिदिएको हो । रिट खारेज भएकाले अर्को आदेश नहुञ्जेल र प्रहरीले अदालतबाट लिएको थप म्याद रहुञ्जेल प्रसाईं प्रहरी हिरासतमै रहनेछन् ।
काठमाडौंमा सर्वोच्च अदालतले बन्दीप्रत्यक्षीकरण रिट खारेज गरेकै दिन उच्च अदालत विराटनगर अन्तर्गत इलाम इजलासले पनि दुर्गा प्रसाईंको अर्को रिट खारेज गरिदिएको छ ।
