काठमाडौं–विद्युत् नियमन आयोगले ६ वटा उद्योगमा काटिएको विद्युत् जडान गर्न निर्देशन दिएको छ । नेपाल विद्युत प्राधिकरणले लोडसेडिङको समयमा डेडिकेटेड तथा ट्रङ्क लाइन विद्युत् प्रयोग गरेको तर प्रिमियम बापतको रकम तिर्न अटेरी गरेको भन्दै ६ उद्योगमा विद्युत आपूर्ति बन्द गरेको छ ।
आयोगले विद्युत वितरण गर्दा र ग्राहक बीच विवाद भएको अवस्थामा विवाद समाधान हुनुभन्दा अघि विद्युत कटौती गर्नु गैरकानुनी हुने भन्दै तत्काल जडान गर्न प्राधिकरणलाई निर्देशन दिएको हो ।
आयोगका अध्यक्ष डा. रामप्रसाद धितालले उपभोक्ता हित संरक्षण सम्बन्धी निर्देशिका २०८० दफा १३ को उपदफा १० को व्यवस्था अनुसार उद्योगमा काटिएको विद्युत् आपूर्ति तत्काल सुचारु गर्न निर्देशन दिएको जानकारी गराए ।
विद्युत् काटिएको भन्दै ६ उद्योगीले गत शुक्रबार आयोगमा निवेदन दिएका थिए । प्रधानमन्त्री केपी शर्मा ओलीले पनि प्राधिकरणलाई विद्युत सुचारु गर्न मौखिक निर्देशन दिएका थिए । गोरखापत्र दैनिकबाट
