पोखरा / विद्यार्थी बोकेर शैक्षिक भ्रमणमा जाँदै गरेको जिप लमजुङमा दुर्घटना भएको छ । जिप दुर्घटनामा परी तीन जनाको मृत्यु भएको छ भने ९ जना घाइते भएका छन् ।
लमजुङका प्रमुख जिल्ला अधिकारी सुशील वैद्यका अनुसार जिप दुर्घटनामा परी एक विद्यार्थी, एक शिक्षक र एक स्थानियको मृत्यु भएको हो ।
गणेश माविका शिक्षक, विद्यार्थी चढेको ग१ज ६३१७ नम्बरको जिप मर्स्याङ्दी गाउँपालिका –२ मा दुर्घटना भएको हो । उनीहरु ‘पिस हिल’ भन्ने ठाउँमा शैक्षिक भ्रमणका लागि जाँदै गरेको बताइएको छ ।
घाइते ९ जना मध्ये दुई जनाको चितवनमा र बाँकी सात जनाको जिल्ला अस्पताल लमजुङमा उपचार भइरहेको सीडीओ वैद्यले जानकारी दिए । जिपमा १६ जना सवार थिए ।
