वासिङ्टन । अमेरिकाको वासिङ्टन राज्यमा फैलिएको भीषण डढेलोले जनजीवन अस्तव्यस्त बनाएको छ। स्पोकेन क्षेत्र केन्द्रबिन्दु बनेको आगलागीका कारण ६० हजारभन्दा बढी मानिस घर छाड्न बाध्य भएका छन् भने करिब ७ सय भवन पूर्ण रूपमा जलेर नष्ट भएका छन्।
तीनवटा ठूला डढेलो मिलेर बनेको ‘स्पोकेन कम्प्लेक्स फायर’ अझै नियन्त्रणमा आउन नसकेको अधिकारीहरूले बताएका छन्। तीव्र हावाका कारण आगोले स्पोकेन नदीसमेत दुई पटक पार गरेपछि आगलागी थप फैलिएको जनाइएको छ।
डढेलोका कारण १० हजारभन्दा बढी घरपरिवार विद्युत् सेवाविहीन बनेका छन्। सोमबारसम्म आधा क्षेत्रमा मात्रै विद्युत् सेवा पुनः सञ्चालन हुन सकेको छ। हालसम्म मानवीय क्षतिको आधिकारिक पुष्टि नभए पनि कम्तीमा १४ जना बेपत्ता रहेकाले खोजी अभियान जारी छ।
परिस्थिति थप जटिल बनेपछि वासिङ्टनका गभर्नर बब फर्गुसनले राज्यभर आपतकाल घोषणा गरेका छन्। उनले संघीय सरकारसँग थप सहयोग माग्दै जोखिम नियन्त्रणका लागि खुला स्थानमा आगो बाल्न प्रतिबन्ध लगाएका छन्।
डढेलो नियन्त्रणका लागि ९०० भन्दा बढी अग्निनियन्त्रक परिचालन गरिएका छन् भने हेलिकोप्टर र अग्निनियन्त्रक विमानमार्फत आगो निभाउने प्रयास जारी छ। अधिकारीहरूले उद्धार कार्यमा अवरोध हुने भन्दै प्रभावित क्षेत्रमा ड्रोन उडाउन पनि प्रतिबन्ध लगाएका छन्।
राष्ट्रिय मौसम सेवाले तीव्र हावा, अत्यधिक सुख्खा मौसम र बढ्दो तापक्रमका कारण अझै डढेलो फैलिन सक्ने चेतावनी दिएको छ। वैज्ञानिकहरूले जलवायु परिवर्तनका कारण यस्ता विनाशकारी डढेलोको जोखिम वर्षेनी बढ्दै गएको बताएका छन्।
