काठमाडौं। मध्यपूर्वमा बढ्दो तनावका बीच पाकिस्तानले अमेरिका र इरानलाई संयमता अपनाउँदै संवाद र कूटनीतिक माध्यमबाट विवाद समाधान गर्न आग्रह गरेको छ। क्षेत्रीय शान्ति र स्थायित्व कायम राख्न सबै पक्षले जिम्मेवार भूमिका खेल्नुपर्ने पाकिस्तानको भनाइ छ।
पाकिस्तानका उपप्रधानमन्त्री तथा विदेशमन्त्री इसहाक दारले आइतबार इरानका विदेशमन्त्री सैयद अब्बास अराघचीसँग टेलिफोन वार्ता गर्दै पछिल्लो क्षेत्रीय अवस्थाबारे छलफल गरेका हुन्।
पाकिस्तानी विदेश मन्त्रालयका अनुसार वार्ताका क्रममा दारले कुनै पनि विवादको दीर्घकालीन समाधान संवाद र कूटनीतिबाट मात्र सम्भव हुने उल्लेख गर्दै अमेरिका र इरान दुवैले संयमता अपनाउनुपर्नेमा जोड दिएका थिए। उनले तनाव थप बढ्न नदिन सबै पक्षले जिम्मेवारीपूर्वक व्यवहार गर्नुपर्ने पनि बताएका छन्।
विदेश मन्त्रालयले जारी गरेको विज्ञप्तिअनुसार पाकिस्तानको यो धारणा जुन २०२६ मा भएको ‘इस्लामाबाद समझदारीपत्र ९एमओयू०’ मा भएका सहमतिअनुसार नै रहेको उल्लेख गरिएको छ। उक्त समझदारीले क्षेत्रीय विवादलाई वार्ता, आपसी विश्वास र कूटनीतिक पहलमार्फत समाधान गर्ने प्रतिबद्धतालाई प्राथमिकता दिएको बताइएको छ।
टेलिफोन वार्ताका क्रममा दुवै विदेशमन्त्रीले मध्यपूर्वको पछिल्लो सुरक्षा अवस्था, क्षेत्रीय स्थायित्व तथा शान्ति कायम गर्ने उपायबारे पनि विचार आदानप्रदान गरेका थिए। बढ्दो तनावले सम्पूर्ण क्षेत्रको सुरक्षा, आर्थिक गतिविधि र अन्तर्राष्ट्रिय स्थायित्वमा नकारात्मक प्रभाव पार्न सक्ने विषयमा समेत छलफल भएको जनाइएको छ।
इसहाक दारले पाकिस्तान क्षेत्रीय शान्ति, स्थायित्व र रचनात्मक कूटनीतिक प्रयासप्रति प्रतिबद्ध रहेको दोहोर्याउँदै सबै पक्षबीच विश्वासको वातावरण निर्माण र संवादलाई निरन्तरता दिनुपर्ने आवश्यकता औंल्याएका छन्।
पाकिस्तानले मध्यपूर्वमा उत्पन्न तनाव समाधानका लागि सैन्य विकल्पभन्दा कूटनीतिक पहललाई प्राथमिकता दिनुपर्ने आफ्नो पुरानै अडान पुनः दोहोर्याएको छ।
