पेरिस— दक्षिण–पूर्वी फ्रान्सको एभिन्योन नजिकको गाउँ गुल्टमा वैवाहिक समारोहमा भएको गोलीकाण्डमा बेहुलीको मृत्यु भएको छ। स्थानीय अधिकारीहरूका अनुसार मास्क लगाएका आक्रमणकारीहरूले गोली चलाउँदा यो घटना भएको हो।
घटनामा एक आक्रमणकारीको पनि मृत्यु भएको छ भने बेहुला र १३ वर्षीय एक बालक गम्भीर घाइते भएका छन्। घटनापछि फरार भएका अन्य आक्रमणकारीहरूको खोजीमा दर्जनौँ प्रहरी र हेलिकप्टर परिचालन गरिएको छ।
फ्रान्सेली सञ्चार माध्यमहरूले घटनालाई लागूपदार्थ सम्बन्धी पुरानो दुस्मनीसँग जोडिएको हुनसक्ने आशङ्का गरेका छन्। घटनाको अनुसन्धान हत्या र हत्या प्रयासको मुद्दाका रूपमा सुरु गरिएको छ।
स्थानीय समय अनुसार आइतबार बिहान करिब ४ः३० बजे बेहुली (२७) र बेहुला (२५) गाउँको सामुदायिक भवनमा सम्पन्न विवाह समारोहबाट निस्किँदै गर्दा आक्रमणकारीहरूले अन्धाधुन्ध गोली प्रहार गरेका थिए।
प्रारम्भिक रिपोर्टहरूमा एक आक्रमणकारीलाई बेहुला–बेहुली सवार कारले ठक्कर दिएको बताइएको थियो। तर, एभिन्योनका अभियोजक फ्लोरेन्स गाल्टिएरका अनुसार ती आक्रमणकारी गोली प्रहार गरेर मारिएका हुन्।
प्रहरीका अनुसार आक्रमणकारीहरू कारमा आएका थिए भने गोलीकाण्डपछि पैदल फरार भएका थिए। घटनाको समयमा हलमा २८ जना उपस्थित थिए। एक महिलालाई सामान्य चोट लागेको प्रहरीले जनाएको छ।
