काठमाडौं— राजावादी प्रदर्शनका क्रममा सशस्त्र प्रहरी बलको ग्यास गन खोस्ने व्यक्तिलाई प्रहरीले पक्राउ गरेको छ। व्यक्ति पक्राउ परे पनि हालसम्म उक्त हतियार फेला भने फेला परेको छैन।
पक्राउ पर्ने व्यक्ति रुपन्देहीको सैनामैना नगरपालिका वडा नम्बर १ निवासी ३८ वर्षीय गोपाल मल्ल रहेका छन्। उनी हाल काठमाडौंको तारकेश्वर—१० मा बस्दै आएका थिए। प्रहरीले उनलाई भिमसेन गोलाबाट पक्राउ गरी गौशालास्थित प्रहरी कार्यालयमा बुझाएको हो।
बन्दुक अझै बेपत्ता, खोजी जारी
घटनापछि प्रहरीले हराएको ग्यास गनको खोजी तीव्र पारेको छ। तर, अहिलेसम्म उक्त बन्दुकको अवस्थाबारे कुनै ठोस प्रमाण भेटिएको छैन। सुरक्षाकर्मीहरूलाई लक्षित गरेर गरिएको यो घटनाले सुरक्षा चुनौती बढाएको छ।
प्रहरी स्रोतका अनुसार मल्लविरुद्ध राज्यद्रोह र संगठित अपराध अन्तर्गत मुद्दा दर्ता गरिएको छ। उनीमाथि थप अनुसन्धानका लागि म्याद थप गरिने भएको छ।
सुरक्षा व्यवस्थामाथि प्रश्न
यो घटनाले सुरक्षा संयन्त्रमा गम्भीर प्रश्न उठाएको छ। भीड नियन्त्रणमा खटिएका सशस्त्र प्रहरी बलका जवानबाट बन्दुक खोसिनु सुरक्षा प्रणालीको कमजोरीको रूपमा हेरिएको छ। प्रहरी उच्च अधिकारीहरूले घटनाको छानबिन गर्दै सुरक्षाका नयाँ रणनीति बनाउने तयारी गरेका छन्।
प्रदर्शनमा हिंसा, थप गिरफ्तारीको सम्भावना
तीनकुनेमा भएको राजावादी प्रदर्शनका क्रममा अन्य केही स्थानमा पनि झडप भएको थियो। प्रहरी स्रोतका अनुसार घटनासँग सम्बन्धित अन्य व्यक्तिहरूको पहिचान गर्दै पक्राउ प्रक्रिया अघि बढाइएको छ।
यस घटनाले राजधानीको सुरक्षामा चुनौती थपेको छ भने, हराएको ग्यास गन कहाँ पुग्यो भन्नेबारे अझै अनिश्चितता रहेको छ।
