काठमाडौं— काठमाडौंको चन्द्रागिरी नगरपालिका ४ पानी घाटस्थित चित्लाङ - थानकोट सडकखण्डबाट एक जनालाई प्रहरीले पक्राउ गरेको छ । पक्राउ पर्नेमा दोलखा शैलुग गाउपालिका वडा नं. ६ घर भएका ३२ वर्र्षीय सुवास तामाङ रहेका छन् ।
मकवानपुरको चित्लाङबाट थानकोट आइरहेका उनलाई प्रहरी वृत्त थानकोटबाट खटिएको प्रहरी टोलीले चेकजाच गर्ने क्रममा सालकको खपेटा जस्तो देखिने चिजवस्तु ८ थान, नग्रां एक थान, हड्डी एक थान, दुम्सीको काँडा जस्तो चिजवस्तु तीन थान, नगद रुपैयाँ ५२ हजार र कलर्स कम्पनीको सादा मोबाइल एक थान बरामद गरेको प्रहरी परिसर काठमाडौंका सूचना अधिकारी तथा प्रहरी उपरीक्षक अपीलराज बोहराले जानकारी दिए ।
निजलाई उक्त वस्तुसहित डिभिजन वन कार्यालय काठमाडौं हात्तिसार पठाई थप अनुसन्धान गरिरहेको प्रहरीले जनाएको छ ।
