काठमाडौं— सर्लाहीको लालबन्दी नगरपालिकाभित्रका अवैध रुपमा सञ्चालन भएका १९ वटा स्वास्थ्य संस्था बन्द गर्न मधेश प्रदेशका मुख्यमन्त्री सतिशकुमार सिंहले निर्देशन दिएका छन् । निजी स्वास्थ्य संस्थाको अनुगमनका क्रममा सेवा सञ्चालन अनुमति पत्र नरहेका र मापदण्ड अनुसार सेवा सञ्चालन नभएका १९ वटा स्वास्थ्य संस्थालाई तत्काल बन्द गर्न निर्देशन दिएका हुन् ।
मन्त्री सिंहले लालबन्दी र नवलपुरका २३ वटा स्वास्थ्य संस्थाको अनुगमन गरेका थिए । अनुगमन गरिएका २३ वटा स्वास्थ्य संस्थामध्ये दुईवटा अस्पतालसँग सेवा सञ्चालन अनुमति पत्र दुरुस्त रहेको र दुईवटा अस्पताल नवीकरण गर्नुपर्ने देखिएको बताए।
आफूले अनुगमन गरेर बन्द गर्न निर्देशन दिएको अस्पताल पुनः सञ्चालन भइरहेको गुनासो आएको र त्यससम्बन्धमा स्थानीय प्रहरी परिचालन गरेर निगरानी गर्न प्रदेश प्रहरी प्रमुख (डीआईजी) लाई निर्देशन दिएको बताउए।
मुख्यमन्त्री सिंहले शनिबार बेलुका महोत्तरीको बर्दिवास र सर्लाहीको लालबन्दीका स्वास्थ्य संस्थाको अनुगमन गर्नुअघि शुक्रबारसम्ममा प्रदेशभरका ७५ वटा अवैध स्वास्थ्य संस्था बन्द गराइएको जानकारी दिए। केही ठाउँमा पालिकाले आफ्नो क्षेत्राअधिकार बाहिर गएर आफूले बन्द गर्न निर्देशन दिएको स्वास्थ्य संस्थालाई अल्पकालिन सञ्चालन अनुमति पत्र दिएको पाइएको भन्दै त्यसो नगर्न पालिकासँग आग्रह गरेका छन् ।
