काठमाडौं— घरेलु कामदारलाई खुकुरी प्रहार गर्ने विराटनगर महानगरपालिका-२ स्थित दुर्गा चोकका सक्षम सापकोटालाई प्रहरीले पक्राउ गरेको छ।
कामदारलाई खुकुरी प्रहार गरेर फरार भएका उनलाई करिब ५ घण्टामा प्रहरीले नेपाल–भारत सीमा क्षेत्र नजिकबाट पक्राउ गरेको जिल्ला प्रहरी कार्यालय मोरङले जनाएको छ ।
विराटनगर-२ का अन्दाजी २८ वर्षीय सापकोटाले आफ्नै घरमा काम गर्दै आएका विराटनगर-१ का ५७ वर्षीय रमेश गुप्तालाई खुकुरी हानेर फरार भएको र उनलाई रानी एरियाबाट पक्राउ गरेको जिल्ला प्रहरी कार्यालय मोरङका प्रवक्ता डीएसपी वेद प्रकाश जोशीले जानकारी दिए ।
घाँटीमा चोट लागेका घाइतेलाई उपचारका लागि नोबेल शिक्षण अस्पतालमा भर्ना गरिएको प्रहरीले जनाएको छ। घाइतेको अवस्था गम्भीर रहेको प्रहरीले जनाएको छ।
प्रारम्भिक अनुसन्धानका क्रममा सापकोटा लागुऔषध प्रयोगकर्ता रहेको खुलेको छ।
